Woodworthek liburua argitaratu du Euskal Herriari buruz, ingelesez 
Gatazka politikoaz gain, Euskal Herriko gastronomia eta ekologia ere lantzen ditu Irlandako idazleak 
erredakzioa 

Paddy Woodworth (Bray, 1951) irlandarrak Euskal Herriari buruzko The Basque Country - A Cultural History liburua argitaratu du. Euskal Herria deskribatzeko saioa egiten du idazleak, eta, horretarako, politikari buruzko informazioa emateaz gain, historiaren, ekologiaren, gastronomiaren eta musikaren inguruko informazioa ere lantzen ditu. Oxforden Sigal Booksek argitaratutako liburua atzo aurkeztu zuten Dublinen, eta bihar beste aurkezpen bat egingo dute Londresen. 
Sarreraz gain 15 kapitulu biltzen ditu 256 orrialderekin osatutako liburuak. Woodworthek sarreran dio Euskal Herria zazpi lurraldez osatutako herria dela. Gainera, haren arabera, Euskal Herriaren zatiketa ez da erlijio eta etnia kontua; zatiketa hori «batik bat ideologikoa» dela dio. Beraz, Joe Linehan kritikariak Irlandako prentsan argitaratu duen kritikaren arabera, euskaldunen, frantsesen zein espainolen bertsioak azaltzen saiatzen da autorea, «beste hainbat informatzailek erreparatu ez dien pertzepzio eta errealitate desberdinak azaleratuz». 
Liburua osatzeko hainbat elkarrizketa egin ditu Woodworthek: euskal musika tresnei buruz Juan Mari Beltranekin egin du, esate baterako, eta pilotari buruz, berriz, Olatz Gonzalezekin. 
Linehanek kritikan dioenez, Woodworthen arabera «Frankismoaren eskutik euskal kulturari egin zaion bortxaketa sistematikoaren emaitza da ETA». Gainera, idazlearen arabera, «diktadurak errealitate makabro bihurtu zuen Euskadi nazio okupatu eta zapaldu bat zela zioen Sabino Aranaren fantasia». 
«Garbia, argia eta eskuragarria» da Woodworthen lana, Linehanen arabera. Hain justu, Woodworthek Pio Barojaren lana definitzen duen gisa berekoa. 
'IRISH TIMES'-EKO KAZETARI IZANA. Woodworth Irish Times egunkariko kazetaria izan zen 2002ra arte. Liburu horren aurretik idatzi du Euskal Herriari buruzko lan bat: Dirty War, Clear Hands: ETA, the GAL and Spanish Democracy.