Perretxikozaleen eskuliburua 
Bihartik aurrera Euskal Herriko onddoen gida lortzeko kartilla eta kupoiak eskuratu ahal izango dira BERRIArekin. 
AINARA ARRATIBEL 
Donostia 
Saskia eta labana prest izango dute askok, basora joan eta onddoak biltzeko. Izan ere, sasoi hau urteko oparoenetakoa da. Motxilan, ordea, bada eraman beharreko beste gauza bat: onddoei buruzko liburua edo gida. Horiei esker, bilketa egiterakoan izaten diren zalantzak argitzen dituzte biltzaileek. Euskal Herriko onddoen gida osatu du BERRIAk, Aranzadi Zientzia Elkartearekin batera, eta Kutxaren laguntzarekin. Bihartik aurrera eskuratu ahal izango dira hura lortzeko kartilla eta kupoiak. 
Euskal Herrian aurki daitezkeen 110 perretxiko ohikoenak biltzen dira gidan: jangarriak eta pozoitsuak. Perretxikoaren argazkiarekin batera, bakoitzaren inguruko fitxa bat ageri da. Bertan, izenarekin batera, alearen txapelaren, orrien, hankaren, mamiaren, esporen, habitataren eta jateko balioaren azalpenak ematen dira. Baina gidan mikologiari lotutako beste hamaika kontu aurki daitezke. Garrantzitsuenetakoa intoxikazioei lotutakoa da: zein mota daude? nola egin aurre?... 
Azken urteetan gora egin du perretxikoak biltzera joateko zaletasunak. Gero eta jende gehiagok biltzen ditu. Horietako batzuk ezagutzarik gabe joaten dira. Horren ondorioz izaten dira, adibidez, intoxikazioak. Halakoak ez gertatzeko, eta biltzera doazenek argibideak izan ditzaten, aholku batzuk ematen dira. Horietako askotan natura errespetatzearen garrantzia nabarmentzen da. Izan ere, onddoak biltzera joan eta askok sekulako kaltea eragiten diote naturari. 
Biltzea bezain garrantzitsua da perretxikoak behar bezala kontserbatzea. Horri ere arreta berezia jartzen zaio. Modu asko daude elikagaiak kontserbatzeko, baina gutxi batzuek balio dute perretxikoetarako. Gidan bost modu erraz azaltzen dira. 
NOLA LORTU? Perretxikoen gida lortzea oso erraza izango da. Bihar gida eskuratzeko kartilla banatuko da BERRIArekin, eta kartillarekin batera lehen kupoia -14 izango dira guztira-. Kupoi guztiak kartillan itsatsi, kioskora eraman eta doan jasoko duzue gida. Ipar Euskal Herriko irakurleek ez dute kartilla bete beharko. Zuzenean deitu beharko dute harpidetza telefonora: (0034) 943-30 43 45. Harpidedunek ere ez dute beharrezkoa kartilla betetzea. Nahikoa izango dute (0033) 943-30 43 45 telefonora deitu eta eskaria egitea, edo www.berria.info helbide elektronikoan izena ematea. Bidaltze gastuen truke (1,95 euro) etxean bertan jasoko dute. 
############
Nola eskuratu gida? 
Bihar zure kartilla eskuratu BERRIArekin. 
14 egunetan BERRIAn argitaratuko diren kupoiak kartillan itsatsi. Kartilla osatzean, kioskora eraman, eta doan jasoko duzue liburua. 
*Harpidedunek nahikoa izango duzue (0034) 943-30 43 45 telefonora deitzea; edo www.berria.info helbide elektronikoan izena ematea; eta bidaltze gastuen truke (1,95 euro) etxean jasoko duzue gida.