Denok erabiltzen dugu Euskal literaturaren historia : lizeo eta unibertsitateko ikasle eta irakasleek, kazetariek, idazleek berek eta, erabiltzaile berezitu horiez gain, publiko zabal batek euskal kulturaz ditugun egun guztietako solasetan. Molde konziente batez edo partez bederen gehiegi pentsatu gabe, euskal literaturaren historiaz urteetan zehar eraikia izan den "kondaketa nagusi" bat erabiltzen dugu gure egitekoetan. Hogei urte hauetan, "Euskal Literaturaren Historia" multxo pollita argitaratu da. Sekulan baino material gehiago badago eskuragai eta, lehengoa baino aise hobea eta osatuagoa dela erran daiteke. Bainan, historien kopurua joriturik ere, denak eredu beretik ari dira. Badirudi denentzat onagarria den eredu bat finkatua izan dela, hein batean "kontsentsuala" dena. Badugu eginbide bat guziz premiazkoa : denok inplizitoki onartzen dugun ikusmoldea aztertzea.