Lurraldean zehazki markatu lerro gisa ulertzen diren mugak norberaren buruan eraikiak dira eta haien xede bakarra jendeak duen munduaren ordenatzeko beharrari jarraikitzea da. Gisa berean, elkarren kontrako kategoriak erabiliz errealitatea puskatzen duen bitariko pentsamenduaren helburu bakarrak errealitatearen azaltzea eta moldatzea dira; ez haren ulertzea.
Modernotasuna eta aitzinamendua geroko bide bakar gisa presentatzeak buruan mugak ezarri dizkigu. Endemis(t)moak, muga bizileku izeneko ekimenak muga horiek gainditu nahi ditu, kanpainako munduari bertze molde batez hurbilduz. Bide hortan, kanpainako ingurumenaren eta jardueren iragana eta oraina esplikatzen omen duten dikotomia faltsu batzuk deseginez joanen dira.
Muga ideologiko eta kontzeptualen arbitrariotasunak urratu mundu baten aitzinean, mugako lurralde andana bat ageri da. Horiek gure jarrerak berriz planteatzera behartzen gaituzte, baina aldi berean laguntzen gaituzte gure buruarentzat gozoegia litzatekeen sinplifikazioaren bidea saihesten.