Elcano, lehen mundu-bira marrazki bizidunetako filma iritsi da pantaila handietara, lehen mundu-biraren bosgarren mendeurreneko ospakizunen harira. Filma Joan Sebastian Elkanoren hagiografia hutsa da, eta inperialismoaren gorazarre erabatekoa egiten du. Kolonialismoaren zuriketa nabarmen hori bat dator Espainiako Estatuan bizi dugun inperiofilia-aroarekin. Ez da harritzekoa filmak Espainiako Kultura eta Kirol Ministerioaren finantzazioa edukitzea eta RTVEren parte-hartzea. Harrigarriagoa da, ordea, filma euskaraz filmatuta egotea eta EITBk parte hartu izatea, baina agerikoa denez, mendebaldar nagusitasunaren sinesmena guztiz hedatuta dago.