Gure planeta, Lurra, puntu ñimiño bat da, itzulika dabilena izar baten inguruan, Eguzkiaren inguruan. Astro handia da gure planeta-sistemaren erdigunea, eta haren grabitateak gure zazpi planeta haurrideak erakartzen ditu. Eguzki-sistemako planetak oso desberdinak dira, eta haietako paisaiak ere bai: Artizarrekoa desertu kiskalgarri bat da, Marten hauts gorria dago nonahi, Jupiterrek hodei-zurrunbiloak dauzka, Saturnok eraztun liluragarriak, Urano izotzezko bola erraldoi bat da eta Neptunok gas urdinkara bat du bereizgarri. Gonbidapena egiten dizugu urrutiko mundu horiek ezagutzeko, gure eguzki-sistemako paisaia zoragarrietara bidaiatzeko: hain daude urruti eta hain dira desberdinak, non gure adimenari neke baitzaio haiek irudikatzea.